Duket se përdhunimi i vajzës 15-vjeçare nuk është rasti i vetëm, pasi të njëjtin fat kanë patur edhe dy shoqet e saj. Detaje të reja janë hedhur në dritë mbi abuzimin e minorenes. Në studion e emisionit “Me Zemër të Hapur” në News 24, gazetarja Dorjana Bezat ka zbuluar se nga biseda që ka pasur me minorenen, në dijeni për gjithë abuzimin ishin edhe dy shoqet e saj. Edhe këto vajza janë ngacmuar nga Abas Doku. Skandali i përdhunimit të 15-vjeçares në zonën e Babrrusë në Tiranë nga 65-vjeçari dhe 3 adoleshentët, merr përmasa më të mëdha, pasi e mitura dyshohet se është dhunuar për 4 vite me radhë, që në klasën e 5-të.
“Vajza ka thënë se edhe dy shoqe të saj kanë pësuar të njëjtën gjë, janë abuzuar në këtë shtëpi. Njëra nga vajzat e tjera është shpërngulur me familjen jashtë Shqipërisë, nuk është këtu. Ndërsa vajza tjetër jeton në Babrru. Duhet të ketë hetime edhe për këto raste”, tha gazetarja.
Në një lidhje telefonike me emisionin, mësuesja kujdestare e vajzës deklaroi se gjatë kohës që e mitura ka qënë në shkollë, nuk ka shfaqur ndonjë shenjë shqetësuese. “Nuk kam vënë re asgjë shqetësuese gjatë kohës së gjimnazit…Një herë kur ka munguar 2 apo 3 ditë, vura në dijeni nënën. Ajo erdhi në shkollë, më solli raport. Diskutuam dhe më tha se ishte e sëmurë me temperaturë”.
65-vjeçari Abaz Doku, i akuzuar për përdhunimin dhe shantazhimin e 15-vjeçares, u paraqit sot në gjykatë. Përkrah tij ishte i ulur i akuzuari tjetër, K. Poçi 20 vjeç. Ndërkohë dy të akuzuarit e tjerë, R.O dhe F.B, të dy 15 vjeçarë, nuk u nxorën fare para trupës gjykuese për shkak të moshës së tyre minorene.
Gjykata e Tiranës pranoi masën e sigurisë së kërkuar nga Prokuroria, duke i lënë të katërt në “arrest me burg”, edhe pse mbrojtja kishte kërkuar masë më të lehtë për të miturit.
