E ftuar në “Soiree” me Jonida Shehun në Top Channel, për të folur për temën “Gratë në media”, gazetarja e njohur e “Abc News” Juli Xhokaxhi, ndau me publikun një episod që ka patur me Anila Bashën në redaksinë e gazetës “Koha Jonë”. Ajo tha se në fillimet e saj, Anila Basha tallej me të. Duke përfituar nga rasti, e vinte ‘në lojë’ lidhur me tekstet që bënte, ndërsa ende nuk ia kishte marrë dorën aktualitetit.
“Unë nuk isha marrë ndonjëherë më parti të mëdha. Basha i thotë Çipës të shkojë kjo e reja në grupin parlamentar të PS-së, dhe Çipa më thotë që ‘është mbledhja e grupit parlamentar të PS-së, dhe do të shkosh t’i bësh edhe një intervistë Arben Malajt’.
Unë isha zero atëherë nga politika, as nuk e ndiqja, as nuk e doja. Mbaj mend që kam shkuar dhe e kam nisur tekstin e kronikës ‘sot në godinën e kryesisë së Kuvendit të Shqipërisë, u mblodh grupi parlamentar i Partisë Socialiste’, dhe e merr Basha tekstin tim dhe tallej. Pas kësaj, aty e kam marrë shumë seriozisht. Aty fillova të lexoja gazetat çdo mëngjes”, ka treguar gazetarja e njohur, Juli Xhokaxhi.
