Gazetari i njohur i “Frankfurter Allgemeine Zeitung” Michael Martens, javën e kaluar zhvilloi një intervistë me Presidentin e Kosovës Hashim Thaçi për dialogun me Serbinë, veçanërisht për takimin e paralajmëruar me homologun serb Aleksandar Vuçiç në Washington, me ndërmjetësimin e Richard Grenell.
Mirëpo pas akuzave të ngritura, Thaçi dhe kryeministri i Kosovës Avdullah Hoti e anuluan pjesëmarrjen në takimin me Serbinë në SHBA.
Gazetari Martens, sot, shkruan se Thaçi donte që të fitonte mbështetjen amerikane në mënyrë që të shmangte aktakuzën:
“Thaçi ka qenë kritik ndaj Bashkimit Evropian me muaj të tërë dhe në të njëjtën kohë ai nuk e humbet mundësinë për të lavdëruar udhëheqjen amerikane të Donald Trump dhe të dërguarit e tij të veçantë për Ballkanin, Richard Grenell.
Diplomatët perëndimorë në Prishtinë kanë dyshuar prej kohësh se kjo mund të nënkuptojë se Thaçi shpreson për mbrojtje amerikane – duke u paraqitur si partner i domosdoshëm për Washingtonin, ai dyshohet se dëshironte të fitonte mbështetjen politike amerikane në mënyrë që të shmangte një aktakuzë për krime lufte.
Nëse vërtet do të ishte e tij llogaritja, tani është shkatërruar”.
