Gazetari Elton Kikia me 13 vite eksperiencë, ka lënë profesionin dhe i është dedikuar fermës së tij me gomarica. I ftuar në emisionin “Good Morning Albanians” në “Euronews Albania”, ai është shprehur se do i dhurojë kryeministrit Edi Rama një gomaricë. Me shaka shtoi se te vila në Surrel, ka hapësirë që të kullosë shumë gomarica.
“Te vila e kryeministrit në fshat ka goxha hapësirë, atje mund të kullosin shumë gomarica. Do i bëj dhuratë një gomaricë Ramës, do ishte kënaqësi të shkojë deri në Surrel për ta çuar”, tha ai.
Gazetari i cili la profesionin për fermën e gomaricave, pak ditë më parë ka marë çertifikatë mirënjohje nga Rama.
Gjatë vizitës së tij në Elbasan, Rama mori pjesë në ndarjen e certifikatave të mirënjohjes për qytetarët të cilët kanë investuar dhe kanë kontribuuar për qytetin e tyre.
Ndër personat që u vlerësuan me titullin e “Mirënjohjes” ishte Elton Kikia, gazetari i cili u largua nga profesioni dhe Tirana për të jetuar në fshat, ku ka hapur një fermë gomaricash.
Ai thotë se preferon më shumë të merret me gomaricat, se sa të durojë stresin që i shkakton Tirana.
