Ish-ministri i Brendshëm, Saimir Tahiri ka lënë një shije të hidhur në opinionin publik me akuzat e ngritura ndaj tij për përfshirjen në trafikun e drogës midis Shqipërisë dhe Italisë. Një ndër ta të cilin Tahiri e ka shoqëruar edhe në arat e mbushura me kanabis para një viti, është edhe gazetari i “The Economist”, Tim Judah. Ky i fundit në vitin 2016 i kushtoi një reportazh fenomenit të kanabisit në Shqipëri, por nuk do t’ia merrte mendja se subjekti i reportazhit të tij ish-ministri i Brendshëm do të ishte i përfshirë në trafikun e drogës. Zhgënjimin e tij, Judah e ka hedhur edhe në twitterin e tij. Ndërsa ka kuptuar më fund arsyen e italianëve që nuk i rrëfyen mbi Tahirin mbi 18 muaj më parë.
“18 muaj më parë, kur pyeta italianët rreth Tahirit, ata refuzuan të flasin. Tani po bëhet e qartë pse”, shkruan Tim Judah, teksa këtë përfundim të tijin e shoqëron me lajmin e BalkanInsight: “Prokurorët kërkojnë arrestimin e Saimir Tahirit”, shkruan ai.
18 months ago when I asked the Italians about Tahiri they refused to speak. Now it is becoming clear why. https://t.co/bX0elwgvvK #Albania
— Tim Judah (@timjudah1) October 19, 2017
Në kohën kur Judah vizitoi vendin, Tahiri drejtonte ministrinë e Brendshme. Ai e shoqëroi gazetarin britanik në Tragjas ku policia po zhvillonte një aksion anti-drogë. Po të lexosh shkrimin e plotë në “The Economist”, Tim Judah nuk lë pa përmendur faktin se pse zyrtarët italianë tregohen të rezervuar për sa i përket Saimir Tahirit. “Plantacionet tani janë përtej Lazaratit. Por zyrtarët italianë refuzojnë të flasin, ndërsa shqiptarët janë seriozë kur bashkëpunojnë me ta”, – shkruante dikur gazetari.
