Lirimi i Ramush Haradinajt vazhdon të jetë kryetitull në ballinat e gazetave serbe.
Gazeta ‘Kurir’ pretendon se ka zbuluar lidhjen mafioze të lirimit të Haradinajt. Sipas “Kurir”, lirimi i Haradinajt është bërë i mundur përmes bashkëshortes së ish-kryeministrit britanik Tony Blair.
Trupi gjykues Matrix, i udhëhequr nga Cherie Booth (Cherie Blair), ishte ai që bëri të mundur lirimin e Haradinajt nga gjykata franceze. Kjo gazetë pretendon se gruaja e Tony Blair mori të paktën 360.000 euro për përfundimin me sukses të procesit ndaj Haradinajt, duke penguar ekstradimin në Serbi ku do të gjykohej për krime lufte.
Shumica e avokatëve të mbledhur në kompaninë Matrix, sipas “Kurir”, janë profesionistë me shumë përvojë dhe themeluese e këtij grupi, thuhet të jetë, gruaja e Blair. Gazeta serbe shkon edhe më tutje, duke thënë se paratë për këtë shërbim, që janë gati gjysmë milioni euro, i kishte siguruar kryeministri shqiptar, Edi Rama.
Lidhjen me Ramën, “Kurir” e bën duke u nisur nga fakti se Rama, para se të vinte në krye të shtetit shqiptar, kishte angazhuar si këshilltar të tij ish-kryeministrin britanik Blair.
