Presidenti i Partizanit, Gaz Demi, ka folur për çështjet aktuale në futbollin shqiptar, nga zgjedhjet në FSHF deri tek situata katastrofike që është ekipi në këtë moment. Demi ka hedhur poshtë mbështetjen e ndonjë kandidati të mundshëm dhe ka mohuar shanset për kandidimin e tij për atë post. Vota e Partizanit do të shkojë për futbollin e mirë shqiptarë, pra do të votohet ai që do të paraqesë platformën më të mirë. Por nuk mohon faktin që Duka mund ti fitojë sërish këto zgjedhje dhe e cilëson si një kandidat të fortë.
“Ne si Partizan nuk kemi asnjë kandidaturë. Por do të shohim cilët do të jenë kandidatët dhe unë e kam thënë edhe herë të tjera, do të shoh dhe do të votoj për platformën më të mirë për futbollin shqiptar kushdo që të jetë, ky president që është apo ndonjë kandidat tjetër.
Më kanë thënë edhe më parë disa miq të mi që të kandidoja për president, dikur s’kisha lidhje me futbollin fare. Por nuk mund të kandidoj edhe pse kam shumë dëshirë të bëj gjëra të mira për vendin tim. Tani kam edhe konflikt interesi, pastaj edhe presidenti aktual është shumë i fortë vështirë të mundet”, tha fillimisht numri një i presidencës së kuqe në një intervistë për “Top Channel”.
Situata që po kalon Partizani në këtë sezon mund të quhet disfata më e madhe që ka parë ndonjëherë ekipi nën drejtimin e presidentit Gaz Demi. Vetë ai ka pranuar se është një turp ky që po ndodh, por situata është drejt normalizimit dhe se shumë shpejt do të jetë në nivele të larta.
“Në këto vitet e mia kjo është situata më e turpshme për Partizanin dhe më e vështirë. Megjithatë mendojmë sikur tani jemi futur në shina për të rikuperuar kohën e humbur. Ndeshja e Gjirokastrës është maskaradë, edhe sot kur e kujtoj nuk di çfarë të them. Nuk mund të them nëse ka patur poshtërsi apo jo, se pa fakte nuk mund të flas. Për zërat që kam dëgjuar në ka vërtetësi, sot jemi në një kohë ku kontrollohet e verifikohet gjithçka. Domethënë atë ditë ishte një skuadër pa karakter, sot kur e kujtoj më vjen turp”.
“Të kuqtë” kanë një peng të madh nga sezoni 2015-16, ku FSHF akoma nuk u ka dorëzuar titullin e shumëpërfolur që iu hoq Skënderbeut pas dënimit që mori nga UEFA. Për këtë çështje Demi është shprehur: “Titulli nuk mund të rri në sirtarin e Federatës. Duhet ta marrë vendi pasardhës. Aq më tepër që ne u përfaqësuam nga UEFA jo nga federata në Champions League”.
