Olsi Rama është shumë shpejt pritet të marrë detyrën e Drejtorit të përgjithshëm tek klubi i Partizanit. Ai gjithmonë ka qenë i afërt me këtë klub dhe së fundmi ka marrë pjesë në kursin për Drejtor Sportiv nën drejtimin e Sektorit të Edukimit që organizonte Federata Shqiptare.
Vëllai i kryeministrit Edi Rama, ishte pranë klubit “të kuq” edhe në ndeshjen e javës që lamë pas në “Selman Stërmasi” përballë Teutës. U pa në fushë në momentin që lojtarët e Partizanit vendosën të mos startojnë ndeshjen pa u lejuar tifozët që të futen në stadium. Fakt ishte se kapiteni Batha pas debatit që pati me drejtuesit e policisë, u drejtua të flasë me Olsi Ramën për të zgjidhur këtë çështje, e cila pas pak minutash u zgjidh me qetësi. Por lajmi për të marrë këtë post pohohet nga burime pranë presidentit Gazmend Demi, raporton Report Tv.
Edhe pak ditë më parë, vetë ish- basketbollisti Olsi Rama nuk e mohoi këtë gjë, kur u pyet nga mediat, teksa ishte i pranishëm në kursin për Drejtor Sportiv nën drejtimin e Sektorit të Edukimit që organizonte Federata Shqiptare. “Prandaj e nisa këtë kurs që të mësoj diçka më shumë. E kam thënë gjithmonë se jam i apasionuar pas futbollit. Partizani ka qenë gjithnjë pjesë e këtij pasioni për futbollin. E kam ndjekur gjithmonë nga afër, tani do ta ndjek nga akoma më pranë”, tha ai.
