Shqipëria komuniste, kishte një nivel të lartë gatishmërie në aspektin ushtarak. Sipas ish-ushtarakëve dhe ekspertëve, nëse vendi sulmohej pa asnjë paralajmërim, struktura ushtarake lejonte që për 72 orët e para, të mund të viheshin nën armë të paktën 750 mijë njerëz.
Ushtria shqiptare zotëronte 240 mjete fluturuese, shumica avionë sulmues MIG, rreth 1200 tanke dhe mjete të blinduara dhe 100 anije luftarake. Gjithashtu kishte në dispozicion 240 raketa kundërajrore, dhe 4000 gryka zjarri, 6 të tilla për çdo km të frontit të luftës. Para viteve 1990, niveli i gatishmërisë, krahasohej me atë të Izraelit.
Brenda 6 orësh mund të kompletohej një brigade me 5-7 mijë trupa. Një korpus, vihej në gatishmëri të plotë brenda 9-10 orëve. Ushtria shqiptare përbëhej nga rreth 16.500 oficerë, 9.000 nën/oficerë, 60.000 ushtarë si dhe nga rreth 8.000 civilë.
Ndërkohë në gatishmëri ishin 450 mijë rezervistë, dhe 230.000 forca vullnetare. Në total 22 divizione. Në rastin e një agresioni në kufi mitralozët, dhe bateritë e gatshme të artilerisë kundërajrore hapnin zjarr për 2-3 minuta.
