Thomas Strakosha dhe Totenhem sërish në qendër të vëmendjes. Gardiani kuqezi është kthyer në ‘objektivin’ kryesor të mediave angleze i cili shihet si pasuesi i Hugo Loris. Një gabim i bërë nga portieri francez në ndeshjen ndaj Liverpulit. Mirëpo, pavarësisht informacioneve që raportohen nga mediat angleze, është vetë trajneri Poçetino që kërkon të shmangë zërat e merkatos në këtë fazë finale të sezonit, duke i dalë në mbrojtje portierit dhe kapitenit të skuadrës.
Por emri i Thomas Strakoshës ka muaj që në Londër po diskutohet si një garanci për të ardhmen. Media angleze bën me dije se 35 milionë sterlina ose rreth 41 milionë euro mund të jetë kostoja totale për kartonin e shqiptarit.
Përtej informacioneve trajneri i Totenhemit ka menduar që të thyejë heshtjen dhe të konfirmojë kapitenin e skuadrës:
Mauricio Poçetino ka deklaruar se Loris ka besim të plotë. “Ai është kapiteni im. Loris është një nga portierët më të mirë në botë. Nuk ka asnjë dyshim për këtë dhe do të jetë në portë. Ndaj Liverpulit ishte e dhimbshme që të dilnim me atë rezultat sepse meritonim më shumë, por i tillë është futbolli. Janë gjëra që ndodhin”, është shprehur Poçetino.
