Një fushatë ndryshe nga çfarë është parë deri më sot, gara e balotazhit në presidencialet e Ukrainës i ka kaluar të gjitha pritshmëritë. Kjo fushatë është cilësuar si ‘shfaqje e cila duhet të vazhdojë’. Sfidat që po përdoren nga të dy kandidatët, presidenti i tanishëm Petro Poroshenko dhe komediani Volodymyr Zelenskiy, janë nga më të padëgjuarat.
Stafi i fushatës së Poroshenkos është përpjekur që ta përfshijë Zelenskiy-n në një debat të fokusuar tek reformat e vendit. Ndërkohë komediani nuk ka hezituar për ta pranuar debatin që pritet të zhvillohet në stadiumin Olimpiyskiy.
Por Zelenskiy nuk e ka lënë me kaq dhe ka kërkuar që të dy kandidatët t’u nënshtrohen testeve të drogës dhe alkoolit. Menjëherë Poroshenko është dakortësuar me thirrjen e tij dhe të premten u shfaq në televizion, duke iu nënshtruar një testi të tillë. Të njëjtën gjë bëri Zelenskiy por duke shkuar në një klinikë private.
