Gara për postin drejtues të FSHF-së ka hyrë në një fazë të nxehtë. Kur kanë mbetur edhe pak kohë në dispozicion nga data e zgjedhjeve, kandidatët rendin të shpalosin platformat e tyre. Deputeti i PS, Bashkim Fino, i cili është sfiduesi më i fortë i kreut aktual të FSHF-së,Armand Dukës, ka shkruar në lidhje me abuzimet nga shoqatat fantazmë dhe mashtrimet e tjera në lidhje me futbollin.
Fino shkruan se ndjen keqardhje për mashtrimet që i janë bërë futbollit, ndërsa shton se nuk ndihet aspak mirë kur dëgjon se figura me kontribut në sport janë keqpërdorur.
“Të gjithë këto figura të njohura të sportit kanë thënë njëzëri: – “Nuk dimë gjë për pjesën e regjistrimit dhe pjesën ligjore. Ato i ka marrë përsipër Federata”. Drejtësia vonon, por nuk harron. Deri në fund, për një futboll të pastër dhe të ligjshëm”-shkruan Fino.
Ish-kryeministri shkruan se platforma e tij do të jetë e bazuar në një strategji të pastër, dhe do të ndihmojë për një strategji dhe drejtësi në futbollin shqiptar.
Statusi i Bashkim Finos
Sqarim për keqdashësit e futbollit
Pastërtia dhe drejtësia në futboll është pika më kryesore e platformës sime. Më vjen keq që për kaq vite është abuzuar me ilegalitet dhe shoqata fantazmë. Më vjen keq që për kaq vite është mashtruar një komunitet i tërë futbolli. Më vjen keq që disa persona kanë pretenduar në mënyrë joligjore që janë përfaqësues të disa organizimeve që merren me fëmijët. Me të ardhmen e vendit tonë. Më vjen keq që disa figura të njohura të sportit janë keqpërdorur ligjërisht.
Të gjithë këto figura të njohura të sportit kanë thënë njëzëri: – “Nuk dimë gjë për pjesën e regjistrimit dhe pjesën ligjore. Ato i ka marrë përsipër Federata”. Drejtësia vonon, por nuk harron. Deri në fund, për një futboll të pastër dhe të ligjshëm.
Bashkim Fino
