Ish-lojtari i të rinjve të Skënderbeut, Dorian Tahirllari, ka ndërruar jetë mbrëmjen e djeshme në moshën 18-vjeçare.
Futbollisti zbuloi se vuante nga tumori malinj në stomak, shtyllën kurrizore dhe në veshka para më shumë se një viti. Në atë kohë ai kërkoi edhe ndihmën e njerëzve për të kryer operacionin e vështirë.
Por pavarësisht vuajtjeve të mëdha dhe kurimeve, 18-vjeçari nuk mundi ta fitojë betejën me sëmundjen e rrezikshme.
“Në shtator zbulova se njëri testikul ishte enjtur. Erdha në shtëpi, u tregova çfarë kisha. Pastaj shkova në spital (të Korçës) bashkë me familjen dhe më thanë që duhej të shkoja në Tiranë. Atje bëra operacion. Doktori këtu më tha që nuk ke nevojë për kimioterapi, edhe në stërvitje mund të shkosh. Fillova stërvitjen shpejt. Më vonë më filloi një dhimbje mesi. Lashë stërvitjen dhe këta (mjekët) më thanë duhet operacion i dytë dhe shkova në Maqedoni. Kam dy muaj, por do të doja të kthehesha që nesër, por të kalojmë këtë”, shprehej Tahirllari në një prononcim për News24 vitin e kaluar.
