Dita e parë e tetorit mbyll me një lajm të mirë për të gjithë personat që kanë nevojë për gjak. Për gjatë gjithë ditës shumë vullnetarë iu bashkuan nismës humane “Dhuro Gjak” të iniciuar me një fushatë sensibilizuese nga fondacioni “Fundjavë Ndryshe”. Përgjatë gjithë ditës u mbushën mbi 433 qese gjaku me dëshirën e mirë për të ndihmuar njerëzit që kanë nevojë jetike për lëngun magjik.
Në ambientet e këtij fondacioni në Tiranë dhe Durrës, duke nisur që nga ora 09:00 janë shfaqur qindra persona, shumica e të cilëve të rinj, me dëshirën e mirë për të ndihmuar çdo person që ka nevojë për gjak. Të gjithë vullnetarët kishin mundësi të dhuronin gjak deri në orën 18:00. Thirrjes ju bashkuan shumë të rinj dhe të reja me dëshirën e madhe për të shpëtuar jetë, mes dhuruesve dhe figura të artit, sportit dhe kulturës në vend. Nismës ju bashkua dhe klubi i basketbollit “Partizani”.
Kështu, një numër i madh njerëzish kanë dhuruar gjak, duke dhënë një mesazh të madh për të gjithë ata që munden të shpëtojnë një jetë.
Fushata e “Fundjavë Ndryshe” për dhurimin e gjakut do të vijojë edhe në Vlorë dhe Elbasan, të shtunën më 07 tetor, si dhe në Pogradec dhe Dibër, të dielën më 15 tetor.
