Parku i Liqenit të Farkës është pasuruar sot edhe me 200 pemë të tjera falë kontributit të nismës “Fundjavë Ndryshe”.
Ky fondacion iu përgjigj thirrjes së Bashkisë së Tiranës për t’iu bashkuar aksionit të gjelbërimit të qytetit, duke vendosur që sot kontributet e tyre t’i përdorin për një tjetër nevojë që ka shoqëria jonë, siç është gjelbërimi.
Drejtuesi i fondacionit “Fundjavë Ndryshe”, Arbër Hajdari përgëzoi kryetarin e Bashkisë së Tiranës për këtë nismë, e cila sipas tij është shumë të nevojshme për vendin tonë.
“Kjo është një punë shumë e madhe, që jo vetëm bashkia, por mendoj të gjithë qytetarët e Tiranës duhet të përfshihen, jo vetëm në Tiranë, por edhe të qyteteve të tjera, pasi dihet që shqiptarët nuk e kanë pasur marrëdhënien e mirë me pyjet. Unë gjej rastin të ftoj gjithë qytetarët e Tiranës, qoftë bamirësit e “Fundjavë ndryshe”, që është një numër shumë i madh njerëzish për t’i dhënë akoma më shumë kuptim kësaj gjëje që po bëjmë sot. Ky është vetëm fillimi i aktivitetit të “Fundjavës” në bashkëpunim me Bashkinë e Tiranës për mbjelljen e këtyre pemëve, shpresojmë që numri që do të kontribuojmë të jetë një numër akoma më i madh për të arritur qëllimin që kemi vënë”, tha Hajdari.
Nga ana tjetër, edhe Veliaj falënderoi vullnetarët e “Fundjavë Ndryshe”, teksa tha:
“I jam shumë mirënjohës Arbër Hajdarit dhe gjithë vullnetarëve të “Fundjavë ndryshe”. Nevojë njerëzore është edhe gjelbërimi, ajri i pastër. Më pëlqen që sot po adresojmë këtë nevojë, që është në fakt nevoja ulëritëse e një qyteti për më shumë hapësira të gjelbra. Me kontributin e “Fundjavë ndryshe” sot i kemi dhënë qytetit një total prej 200 pemësh. Jemi shumë afër rekordit tonë me 100 mijë pemë dhe besoj që falë kontributit që na dha sot “Fundjavë ndryshe”, jo vetëm do e kapim, por do e kalojmë këtë rekord deri në 21 mars.”
