Fshati Luzhak ka një pamje mahnitëse, piktoreske dhe një qetësi që të krijon një ‘zhurmë’ të madhe. Ky fshat i veçantë ndodhet në Shtimë të Kosovës, e është një nga fshatrat më të bukur sidomos në stinën e vjeshtës.
Megjithatë, fatkeqësisht ky fshat ka vetëm 6 shtëpi, teksa shumica e banorëve e kanë braktisur atë. Të vetmin që e gjen duke soditur natyrën është 72-vjeçari Rexhep Ramadani.
Ky i fundit thotë se ngrihet në 4 të mëngjesit e del në natyre, ku shijon freskinë, qetësinë e pamjen e fshatit.
“Pjesën më të madhe të ditës e kaloj jashtë ambienteve shtëpiake. Dikur e kemi punuar shumë tokën, në këtë vend është bërë buka shumë, por edhe gjërat bereqetet tjera janë bërë.
Kemi ardhur prej Topillës para 100 viteve. Këtu kemi gjetur gjithë të mirat me përjashtim të shkollës, që është pak larg. Tash na ka ardhur asfalti dhe po i dërgojmë me veturë. Nuk është vend i keq për të jetuar, por rini është duke u larguar nga fshati e unë nuk po e kuptoj pse po e bëjnë këtë”, shprehet i moshuari.
Rexhep Ramadani, thotë se ajo që i mungon më së shumti është shoqërimi me të moshuarit, sepse në këtë vend, ai ka mbetur më i vjetri:
“Kur po plaket njeriu nuk po ka çfarë të bëjë, sepse jena mësu me punue, e neve nuk po na le gjaku pa punuar”.
72 vjeçari Rexhep Ramadani tregon për RTV Dukagjini se jetesa në Luzhak ka qenë gjithmonë e mirë, dhe ato pak fise që kanë qenë, kanë pasur harmoni mes tyre.
