Emisioni “BOOM” në RTV Ora solli mbrëmjen e sotme shqetësimin e banorëve të fshatit Bujaras, në njësinë administrative Gjegjan të Elbasanit.
Shqetësimi i tyre është mungesa e rrugës. Janë 4 km që ata duhet të përshkojnë çdo ditë mes baltës dhe llumit.
“Rruga është me baltë dhe llum. I bëjmë thirrje bashkisë ti japë zgjidhje kësaj pune, se do të bllokojmë rrugën. Vetëm unë e kam përcjell këtë shqetësim mbi 50 herë.”
“Të vdekurin e kemi marrë në krah për te varrezat.”
“Premtime sa të duash, por…”
“100 herë janë marrë lekët e kësaj rruge dhe asgjë.”
“Në çdo zgjedhje ka qenë premtim, vinë dhe marrin votat dhe asgjë.”
Fshati nuk ka problem vetëm rrugën por edhe urën e cila rrezikon çdo ditë jetën e banorëve për shkak të amortizimit.
“Është komplet e kalbur, kemi bërë kërkesën prej një viti dhe thonë që do të riparohet, por asgjë nuk është bërë. Shteti të bëjë diçka.”
Gazetari “BOOM” ishte në njësinë administrative Gjegjan. Administratorja thotë se kërkesat e banorëve i ka futur te prioritetet.
“Kemi bërë dhe kërkesë te Shërbimet Publike, dhe për urën dhe për rrugën jemi në dijeni. Ura është gati për tu rregulluar. Unë nuk kam asnjë mjet këtu, kërkesat i kam bërë në bashki.”
Besim Dybeli, përgjegjës i zyrës së informacionit në bashkinë e Elbasanit, thotë se bashkia është në dijeni të shqetësimit të banorëve.
“Për rrugët dytësore të fshatit të Bujarasit dhe për urën është gati projekti që brenda këtij viti do të përfundojnë”. /oranews
