Ministrja e Arsimit, Besa Shahini, e ftuar në emisionin “Kjo Javë”, duke u rikthyer pas në kohë e duke folur për protestat, tha se i shërbyen për të përmirësuar cilësinë e arsimit.
“Unë as protestën e parë nuk e kam marrë me frikë. Na dha të gjithëve një shtytje, për të përmirësuar cilësinë e arsimit. Ne do vijojmë të hapim diskutimin me ta sërish, do t’i dëgjojmë. Po shpresoj që ata të bëhen partnerët tanë në betejën e madhe për përmirësimin e cilësisë së arsimit në Shqipëri”.
Po kështu, ajo ka dhënë një lajm të mirë për të gjithë studentët jashtë Tiranës, teksa tha se do të përfitojnë kartën e studentit. Falë kësaj karte, studentët do arrijnë të marrin shërbimin me zbritje.
“Fillojmë nga kartat e studentit, pasi këtë javë, të mërkurën, nënshkruam një marrëveshje me Postën Shqiptare, në mënyrë që kartën e studentit, me dizajn të ri, të kemi mundësi ta shpërndajmë edhe për studentët jashtë Tiranës.
Ne patëm një bashkëpunim të mirë me Bashkinë e Tiranës, për ta ofruar kartën për studentët që janë rezidentë në Tiranë, por tani po mundohemi me Postën ta ofrojmë atë edhe për studentët jashtë saj.
Do arrijmë që studentët të marrin shërbimet me zbritje me këtë kartë. Ka zgjidhur edhe një çështje tjetër Posta. Vjet nuk arritëm të shpërndajmë bursat. Në këtë kartë do të derdhen lekët e atyre që përfitojnë bursa, por që nuk kanë një llogari bankare”, tha Shahini.
