Njëqind njerëz u mblodhën në parkun e bashkisë për të mbështetur familjen shqiptare, e cila jeton në një furgon për disa muaj.
Javën e kaluar, këshilli i komunës Parthenay në Francë, votoi kundër mundësive ligjore për të ndihmuar emigrantët.
Familja shqiptare e përbërë nga pesë persona, ka qenë në një situatë të pasigurt për më shumë se dy vjet. Dy nga fëmijët janë në shkollë në La Fontaine School, ndërsa vajza më e vogël është dy muajshe.
“Kjo familje kërkon me çdo mënyrë që të integrohet, ajo merr pjesë në ngjarjet e organizuara në komunë, shpjegon Estelle, një vullnetare. Ajo thotë gjithashtu se vendimi i këshillit të komunës është shumë i rëndësishëm dhe duhet që të konfirmojë dëshirën e francezëve për të ndihmuar familjen shqiptare.
Për ta treguar më mirë mbështetjen, njëqind francezë u mblodhën në parkun e bashkisë, për t’u dhënë shqiptarëve mbështetjen e tyre.
Nxënësit që ishin në klasë me djalin e madh të familjes, morën pjesë në protestë duke mbajtur në duar letra të vogla në të cilat shkruhej se ishin në mbështetje të shokut të tyre shqiptar.
Komuniteti po ndihmon familjen në mësimin e frëngjishtes, gjithashtu kanë komunikuar me avokatin përgjegjës për rastin dhe për t’i gjetur kryefamiljarit punë dhe familjes strehim.
Komuniteti i zonës po mbledh para për të financuar blerjen e një shtëpie të lëvizshme për familjen shqiptare. “Të gjitha ndihmat morale dhe financiare janë të mirëseardhura, ata aktualisht jetojnë në një furgon të huazuar nga një banor, furgoni qëndron në parkingun e sallës së sporteve. Kjo situatë duhet të ndryshojë me shpejtësi, duhet t’i ndihmojmë ata të gjejnë një çati të mirë “, thotë një vullnetar.
Burimi: ouest-france.fr
Përshtati: Tirana Today
