Të paktën 20 civilë kanë mbetur të vdekur nga një sulm terrorist në një fshat në pjesën veriperëndimore të Burkina Fasos. Disa persona të maskuar dhe të armatosur kanë hyrë në fshat dhe kanë qëlluar mbi shtëpitë e banorëve duke shkaktuar të paktën 20 viktima. Ndërmjet tyre fëmijë, gra dhe pleq, shkruan BBC.
Ky është rasti i dytë brenda një jave, pasi vetëm para disa ditësh një grup xhihadistësh vranë 39 civilë në një dyqan në Silgadji.
Dhuna e së shtunës erdhi pas njoftimit se Franca do t’i dërgojë 600 ushtarë shtesë në rajonin Sahel, duke e dërguar në pesë mijë numrin e përgjithshëm të trupave në këtë zonë, raporton BBC.
Kriza e sigurisë filloi pas aleancës së separatistëve me militantët islamikë në pjesën veriore të Malit në vitin 2012 dhe ndërhyrjes ushtarake të Francës kundër tyre.
