Ministrja franceze e Çështjeve Evropiane ka deklaruar se Franca nuk do të njohë pavarësinë e Katalonjës.
Nathalie Loiseau tha se në rast se Katalonja deklaron pavarësinë nga Spanja, atëherë një lëvizje e tillë nënkupton përjashtimin e saj nga Bashkimi Evropian.
Gjithashtu, ministrja franceze u shpreh se kriza pas referendumit duhej të ishte zgjidhur përmes dialogut brenda Spanjës.
Teksa hodhi dyshime mbi vlefshmërinë e votimit të referendumit, Loiseau e përshkroi Spanjën si një shtet me demokraci të madhe dhe e vuri theksin në nivelet e larta të decentralizimit që rajonet e vendit gëzojnë.
E gjithë vëmendja është përqendruar te presidenti katalan Carles Puigdemont, i cili pritet të adresojë parlamentin rajonal të martën, ndërsa deri më tani nuk ka shenja të arritjes së një kompromisi me Madridin.
