Ditën e sotme është mbajtur ceremonia e fillimit të kursit profesional të policisë të studentëve të ekselencës, si edhe të kolegjit profesional të lartë “kolegji i policisë”. Në fjalën e mbajtur nga Drejtori i Përgjithshëm i Policisë së Shtetit, Ardi Veliu theksoi suksesin që ka arritur policia shqiptare në vitin që lamë pas në luftën kundër bimëve narkotike. Sipas tij ka qenë një sukses i jashtëzakonshëm që është vlerësuar edhe nga ndërkombëtarët.
Ndërkohë mediat e huaja, kryesisht italiane, por së fundmi edhe ato greke raportojnë sekuestrimin e tonelatave të kanabisit i cili vjen nga Shqipëria për në shtetet fqinje.
Veliu theksoi se : “Viti 2018, shënoi progres të dukshëm në rezultatet e arritura nga Policia e Shtetit në luftën kundër krimit të organizuar, parandalimin dhe goditjen e veprimtarisë kriminale, rritjen e parametrave të sigurisë së rendit dhe asaj rrugore, rritjen e standardeve të kontrollit dhe mbikëqyrjes së kufirit, si dhe parandalimin e goditjen e krimit ndërkufitar.
Rezultatet e arritura për goditjen e kultivimit të bimëve narkotike, gjatë vitit që lamë pas u vlerësuan nga partnerët ndërkombëtar si më të mirat e 30 viteve të fundit.”
Fjala e plotë e Ardi Veliut:
I nderuar Z. Kryeministër,
I nderuar Z. Ministër i Brendshëm,
E nderuar Zj. Kryetare e Komisionit për Sigurinë Kombëtare
Të nderuar përfaqësues të Misioneve, që asistojnë Policinë e Shtetit,
I nderuar Z.Drejtor i Akademisë, të nderuar petagogë,
Të dashur studentë dhe kursantë,
Policia e Shtetit gjatë viteve të fundit i është nënshtruar një procesi të madh ndryshimi, që konsiston në ndryshim mentaliteti, filozofie, performance, koncepti e më e rëndësishmja, arsimimi dhe trajnimi i trupës policore.
Ky proces është në zhvillim dhe në përmirësim nga viti në vit, ku fokusi kryesor është:
- Arsimimi, i cili fillon në kolegjin e Policisë e deri në Fakultetin për Sigurinë dhe Hetimin e Krimit, si dhe më pas në trajnimet e vazhdueshme brenda dhe jashtë vendit.
- Rifreskimi i trupës policore ku gjatë viteve të fundit e deri sot janë rreth 2 mijë djem dhe vajza që janë bërë pjesë e Policisë së Shtetit.
- Forcimi i kapaciteteve profesionale duke bërë pjesë të Policisë së Shtetit profesionistë nga fusha që deri sot nuk është bërë e mundur të përgatiten dhe të shkollohen në Akademinë e Sigurisë.
- Barazinë gjinore ku vajzat dhe gratë në Policën e Shtetit nga viti në vit po rrisin përfaqësimin e tyre.
Ne besojmë dhe jemi të bindur se fuqizimi i këtyre hallkave do prodhojë një shërbim sa më cilësor për komunitetin, pasi Policia e Shtetit është e orientuar drejt filozofisë më të përparuar të policimit në shërbim të qytetarëve dhe si e tillë është e domosdoshme që kjo organizatë të jetë e shkolluar dhe e përbërë me specialistë nga të gjitha fushat, me qëllim përmbushjen e misionit të saj.
Në përmbushje të këtij prioriteti dhe misioni, me mbështetjen e Ministrit të Brendshëm dhe Kryeministrit të vendit, Policia e Shtetit hapi konkurrimin dhe ftoi të rinjtë e të rejat që kishin mbaruar studimet e larta në Ekonomi, Juridik dhe Teknologji Informacioni, të konkurronin për tu bërë pjesë e Policisë së Shtetit me qëllim dhënien e kontributit të tyre për të mirën e vendit dhe shoqërisë, pasi nga viti në vit interesi i të rinjve dhe të rejave për t’u bërë punonjës policie, ka qënë gjithnjë në rritje, ku për patrullë të përgjithshme numri i konkurrentëve ka qenë deri në 10 mijë të rinj e të reja.
Brenda një kohe shumë të shkurtër 541 studentë me rezultate të larta në degët Ekonomi-Financë, Juridik dhe Teknologji Informacioni aplikuan për tu bërë pjesë e Policisë së Shtetit.
Pas një procesi tejet transparent në përzgjedhjen e fitueseve, 53 prej tyre, sot janë këtu për të finalizuar ëndrrën e tyre. Vlen të theksohet fakti që mbi 50 % e studentëve, që do vazhdojnë Kursin Profesional të Policimit janë femra dhe kjo tregon më së miri se Policia tashmë ka një fytyrë tjetër, më sociale më humane, më njerëzore dhe më të fokusuar në zbatimin e ligjit dhe vetëm të ligjit.
Ky interes i jashtëzakonshëm për tu bërë pjesë e radhëve të policisë, na bën të ndihemi krenar, se lufta jonë kundër krimit në të gjitha format e tij dhe shërbimi i ofruar për komunitetin e kanë fuqizuar besimin e qytetarëve dhe në mënyrë të veçantë të brezit më të ri tek Policia e Shtetit.
Ndaj më lejoni që në emër të Policisë së Shtetit, t’ju uroj mirëseardhjen 215 vajzave dhe djemve, që falë dëshirës dhe pasionit të tyre për të qenë punonjës policie dhe pasi kaluan me sukses gjithë fazat e konkurrimit, sot gjenden këtu në mjediset e Akademisë së Sigurisë në Kolegjin Profesional të Policisë, për tu bërë pjesë e Patrullës së Përgjithshme, si dhe të 53 studentëve të cilët u përzgjodhën dhe fituan të drejtën për të ndjekur kursin në Fakultetin e Sigurisë dhe Hetimit ku do të marrin bazat për tu bërë pjesë e familjes së madhe të Policisë së Shtetit.
Të nderuar Studentë dhe Kursantë,
Të jesh punonjës i Policisë së Shtetit është një mision sa fisnik, aq edhe i vështirë, ku kërkon përkushtim, ndershmëri dhe sakrificë.
Arsyeja thelbësore e ekzistencës së organizatës tonë është shërbimi ndaj publikut. Mos e harroni kurrë këtë dhe mos e braktisni kurrë këtë mision të rëndësishëm.
Uniforma, që nesër ju do të mbani, mbart në vetvete historinë, traditat dhe sakrificat e brezave të tërë të Policisë së Shtetit, që janë përballur pa kompromis me krimin duke mos kursyer as gjënë më të çmuar, jetën. Ky akt sublim i tyre është burim frymëzimi për ne, për ju, e për brezat që do vijnë në Policinë e Shtetit.
Periudhën që do të kaloni në këto mjedise uroj që ta shfrytëzoni për të mësuar sa më shumë dhe për të përfituar nga çdo mundësi, që Akademia e Sigurisë ju ofron në drejtim të shkollimit dhe formimit policor, me qëllim që të bëheni punonjës policie të denjë, me integritet dhe profesionalizëm të lartë.
Në sajë të një procesi shumëdimensional reformimi, sot Akademia e Sigurisë është shndërruar në një institucion të rëndësishëm të formimit dhe trajnimit policor, falë vëmendjes së shtuar të Qeverisë, Ministrisë së Brendshme dhe partnerëve ndërkombëtar, të cilët gjej rastin t’i falënderoj.
Përmes programeve të shkollimit dhe të trajnimit të vazhdueshëm, po punohet në mënyrë permanente për trajnimin, edukimin dhe shkollimin e punonjësve të policisë, duke dhënë një kontribut të drejtpërdrejtë në rritjen e kapaciteteve profesionale të strukturave të policisë.
Ky proces do të përmirësohet edhe më tej, me synim formimin e një trupe policore të aftë profesionalisht, për tu përballur denjësisht me sfidat e reja, me të cilat përballet Policia e Shtetit.
Të nderuar pjesëmarrës,
Viti 2018, shënoi progres të dukshëm në rezultatet e arritura nga Policia e Shtetit në luftën kundër krimit të organizuar, parandalimin dhe goditjen e veprimtarisë kriminale, rritjen e parametrave të sigurisë së rendit dhe asaj rrugore, rritjen e standardeve të kontrollit dhe mbikëqyrjes së kufirit, si dhe parandalimin e goditjen e krimit ndërkufitar.
Rezultatet e arritura për goditjen e kultivimit të bimëve narkotike, gjatë vitit që lamë pas u vlerësuan nga partnerët ndërkombëtar si më të mirat e 30 viteve të fundit.
Ky angazhim do të fuqizohet edhe më tej gjatë këtij viti, me qëllim garantimin e parametrave optimal të sigurisë në të gjithë vendin, garantimin e një procesi të qetë zgjedhor, sigurimin e qetësisë maksimale për pushuesit gjatë sezonit turistik, kontrollin e territorit për parandalimin e kultivimit të bimëve narkotike, si dhe në rritjen e forcës parandaluese dhe goditëse kundër krimit të organizuar dhe terrorizmit.
Ju faleminderit!
