Ish-kreu i PD-së, Sali Berisha ka publikuar sot një kartolinë, ku kryeministri i tanishëm, Edi Rama i shkruante nënkryetarit të Presidiumit Popullor, Spiro Kolekës.
Kartolina mban emrin e Edi Ramës dhe vëllait të tij Olsit, të cilët shkruanin:
“I dashur baba Pilo. Ju urojmë gëzuar Vitin e Ri 1983. Shëndet dhe lumturi në familje. Të rrojë Partia dhe xhaxhi Enver. Olsi dhe Edi!”
Teksa poston foton e kësaj kartoline, ish-kryeministri Berisha e quan Enver Hoxhën “kryexhelat”, teksa shkrun: Ja çfare i shkruante Edi Rama xhelatit Koleka per kryexhelatin Enver Hoxha! sb.
Por, duket se Berisha i ka harruar ditët kur lundronte me varkë me të birin e Enver Hoxhës, Sokol Hoxhën dhe bashkëshorten e tij Liljana Hoxha dhe me Isuf Kalon.
Madje, ata janë parë së bashku edhe në një ambient më privat, pranë një oxhaku, i cili mendohet se është një ambient nga shtëpia e diktatorit Hoxha.
Por, çfarë ka thënë Berisha për këto foto?
Në një seancë parlamentare në vitin 2010, Berisha i ka quajtur foto të montuara, duke ironizuar se do të kërkojë që t’ia bëjnë origjinale.
“E patë apo jo? 30 vjet më parë, sikur të ishte 3 vjet më parë Sali Berisha”.
Duket se diktatura është ende aktuale në vendin tonë duke iu referuar jo vetëm “lajkave” të drejtuesve të shtetit, por edhe mendimit të qytetarëve se Rama dhe Berisha kanë ushtruar disi një diktaturë të fshehtë në vend.
