Futbollisti me origjinë shqiptare i Bayern Munich, Meritan Shabani është në qendër të vëmendjes së kombëtares shqiptare dhe asaj të Kosovës. Të dy përfaqësueset shpresojnë që mesfushori i talentuar të zgjedhë njërën nga këto skuadra, por në lojë është edhe Gjermania. Një ditë më parë ish-kapiteni Lorik Cana pohoi se ishte ai negociatori i kuqezinjve për të bindur talentin e Bayernit për të zgjedhur Shqipërinë, por që nuk kishte marrë një përgjigje nga vëllai i futbollistit i cili është edhe agjenti i tij.
Nga ana tjetër trajneri i Kosovës, zvicerani Bernard Challandes u shpreh se Shabani kishte zgjedhur kombëtaren e drejtuar prej tij dhe se këtë ia kishin komunikuar familjarët e futbollistit.
Por, ditën e sotme, Meritan Shabani, ka postuar një foto në Instagram, dhe me mbishkrimin: “Rrugës për tek ekipi kombëtare”, gjithashtu, shoqëruar me një top futbolli, dhe flamurin e Gjermanisë.
Siç bëhet me dije, ai është ftuar nga kombëtarja U-20 e Gjermanisë, nga trajneri Meikel Shonuitz, për ndeshjen e 7 shtatorit ndaj moshatarëve të Republikës Çeke. Gjithsesi, bëhet fjalë për kombëtaret e moshave, dhe ai nuk ka bërë ende një ndeshje zyrtare me ekipin e parë A.
