Pas mbarimit të studimeve në Universitetin e Memphis për fotografi në 2006, Pixy Liao nuk e dinte me siguri se çfarë donte të fotografonte.
“Unë vija nga Kina në Amerikë dhe isha në një shok kulturor. Unë nuk e dija se cila duhet të isha.”
Në fillim ajo nisë të fotografojë peizazhe dhe portrete, por përsëri nuk ndjehej e plotësuar. Më pas ajo iu drejtua vetes dhe lidhjes së saj me Moron, një muzikant jazz-i. Deri këtu nuk ka asgjë të çuditshme, madje shumë prej jush do ta konsideronin romantike. Por, Liao nuk donte të pozonte si shumë çifte të tjera. Përkundrazi pozat e tyre janë shumë kontradiktore, madje shumë i kanë cilësuar edhe provokuese.
Në një foto, shihet teksa mban Moron në krahë si të ishte një bebe gjigante. Një tjetër situatë e fotografuar është teksa i dashuri i Liaos qëndron i shtrirë në tavolinën e kuzhinës, nudo, i mbuluar me vetëm një papaja.
Në disa raste janë poza të ëmbla, sureale, e në të tjera joshëse. Fotografia i ka mbledhur 77 fotografitë në një libër “Lidhje eksperimentale Vol.1 2007-2017”. Duke konsoliduar kështu edhe lidhjen e saj 12-vjeçare me Moron.
“Në fillim unë isha më dominante në lidhjen tonë, ndikuar kjo edhe nga fakti që kur unë e njoha isha në universitet dhe kisha një karrierë. Ndërkohë ai sapo ishte diplomuar nga gjimnazi në Japoni. E ndjeja veten e fuqishme dhe mund t’i thosha atij çfarë të doja dhe ai do ta bënte. Por, pasi jetuam bashkë për kaq gjatë, 12 vite tashmë, kam kuptuar që u rritëm me njëri-tjetrin. Dhe kështu duhet të funksionojnë gjithë lidhjet.”
Nëpërmjet fotografive të saj, Liao është duke luftuar edhe një stereotip, i cili ekziston masivisht në ditët e sotme. Veçanërisht kur bëhet fjalë për në rrjete sociale, ku çdo gjë portretizohet si perfekt. Edhe pse shumë prej pozave, disave mund t’iu duken ‘shqetësuese’, artistja kërkon të thyejë mentalitetin e stereotipat e marrëdhënieve./ Përshtati: Tirana Today, Burimi: CNN
