Xherdan Shaqiri pas transferimit tek Liverpool ka udhëtuar drejt SHBA-ve me ekipin anglez, ku do të kryejnë dhe fazën përgatitore. Pas një Botërori mjaft të mirë nga ana e shqiptarit të Zvicrës, ku i shënoi gol edhe Serbisë duke përmbysur rezultatin erdhi edhe firma me gjigantin e Liverpool.
Në Rusi ai dhe Xhaka do të mbahen mend gjatë për festën që bënë pasi i shënuan Serbisë, duke bërë shqiponjën me duar për të treguar origjinën e tyre. Ky gjest u quajt një provokim dhe pati edhe një gjobë nga ana e FIFA-s. Por duket se kësaj radhe provokimi vjen nga SHBA aty ku 26-vjeçari është duke bërë pushimet e tij.
Këtë radhë shqiponjën Shaqiri e ka bërë më vajzën e Ismail Kadaresë e cila është ambasadorja e Shqipërisë në OKB. Fotoja është publikuar nga Besiana Kadare në Facebook ku shkruan: “E kënaqur që takova në NY Xherdan Shaqirin, futbollistin e mirënjohur të Zvicrës, që shënoi gjatë Kupës së Botës kundër Serbisë. Ai është krenar për të qenit shqiptar dhe ne e festuam duke e bërë së bashku këtë gjest, tashmë të famshëm, që pasqyron flamurin e shqiponjës dykrenare. Shumë falënderime për Fadil Berishën për pritjen!”
Në një foto tjetër, Kadare lë statusin: “Një treshe e artit shqiptar, diplomacisë dhe sporteve. Çfarë tjetër?”
