Në kulmin e debatit për çështjen e ndryshimit të kufijve të Kosovës, Rusia nga ana e saj nuk ka vonuar por ka dërguar në Beograd “yllin në ngjitje” të diplomacisë, zëdhënësen e Ministrisë së Jashtme, Maria Zakharova.
Ndërsa, lidhur me këtë lëvizje , portali rus Sputnik e thekson hapur se tashmë hartës së Ballkanit po i bëhet gati gërshëra, e cila normalisht do të lëvizë nga dy fuqitë e mëdha botërore, SHBA e Rusia.
Siç bën të ditur Sputnik, Zakharova ka folur qartë në Beograd duke dhënë sinjalin e parë “jeshil” që Moska nuk do të kundërshtojë një marrëveshje për korrigjimin e kufijve, por vetëm nëse Rusia do të jetë në “tryezë”.
Sputnik thekson se Zakharova ka deklaruar që “deri tani mund të them se janë zhvlerësuar marrëveshjet ndërkombëtare, ku së pari ndër ta është rezoluta 1244 për Kosovën. Qasja jonë për këtë çështje është serioze dhe bazohet në të drejtën ndërkombëtare, në respektimin e sovranitetit të Serbisë, dhe ky qëndrim i Rusisë nuk ka ndryshuar. Të gjithë e dinë shumë mirë në Beograd”.
Sputnik ka publikuar një hartë të Ballkanit duke i vënë gërshërën pikërisht pranë Maqedonisë. Një lojë që duket se do të luhet nëse dështojnë bisedimet në Bruksel.
Aleksandër Vuçiç synon ta mbyllë marrëveshjen me BE-në. Por Moska pikërisht për këtë ka dërguar biondinën simpatike të Ministrisë së Jashtme ruse që të “joshë” publikun por dhe të kërcënojë Vuçiçin.
Injorimi që Zakharova i ka bërë në protokoll kryeministres pro-evropiane serbe, ka qenë një sinjal që është kapur menjëherë nga mediat e Beogradit dhe ato evropiane.
Duke folur gjatë një konference të përbashkët shtypi me Ivica Daçiçin, Zakharova tha se Rusia qëndron fort për të mbrojtur sovranitetin e territorit serb, por shtoi se vendi i saj do të respektojë vendimet e Serbisë./TIRANA TODAY/
