Si çdo të enjte, teksa mbahet seanca plenare në Kuvend, shumë qytetarë kanë shkuar pranë Parlamentit, për t’u kërkuar politikanëve zgjidhje të halleve të tyre.
Por, dita e sotme ka qenë ndryshe. Duket se shumë qytetarë e kanë humbur shpresën dhe nuk u besojnë më fjalëve të politikanëve. I tillë është Saimir Zalla, i cili i vuri sot vetes flakën para parlamentit, por u shpëtua në kohë nga një punonjës i Gardës.
Kush është Saimir Zalla dhe çfarë halli e çoi atë në këtë pikë?
35-vjeçari nga Lezha, në fakt nuk është një emër i padëgjuar më parë. Ai u bë qendër e medies para rreth tre javësh, konkretisht më 16 tetor, pasi hipi mbi një vinç, nga ku kërcënoi se do të hidhej.
Ngjarja ndodhi pranë Pallatit të Kulturës, teksa Zalla qëndroi 90 minuta mbi vinç, derisa zbriti pas negociatave me policinë.
Gjatë qëndrimit në vinç, 35-vjeçari kërkonte me ngulm që t’i sillnin prokurorin e Tiranës. Lezhjani duket se ka parë si mundësinë e fundit kërcënimin me jetë pas një sorollatjeje të gjatë në procese gjyqësore dhe letra drejtuar institucioneve, për të takuar dy vajzat e tij të vogla pas divorcit nga e shoqja.
Kjo e fundit ka një urdhër gjykate që e detyron t’i lejojë vajzat që ta takojnë Saimirin, por nuk e ka lejuar një gjë të tillë. Në këto kushte, 35-vjeçari është detyruar të bëjë vetëgjyqësi.
Zalla është ndarë nga gruaja në vitin 2015 dhe ajo e ka akuzuar atë për dhunë ndaj saj dhe fëmijëve.
Teksa ndodhej mbi vinç, Zalla ka kërkuar ndërmjetësinë e një gazetari për të zbritur. Gazetari Spartak Koka ka qenë negociator në procesin e shpëtimit të Saimir Zallës.
“Ose do të vrisja veten, ose gruan. Nuk jetoja dot pa vajzat e mia!”, me këto fjalë i është drejtuar lezhjani gazetarit Koka, duke treguar hallin e tij.
Pak ditë pas kërcënimit se do të hidhej nga vinçi, Zalla rrëfeu në emisionin “Me zemër të hapur” në News 24 të gjithë historinë e tij. Ai tregoi se para 10 vitesh ishte njohur me ish-bashkëshorten e tij, në atë kohë 17-vjeçe, me të cilën u martua pa lejen e prindërve, martesë e cila nuk u pranua asnjëherë nga prindërit e vajzës.
Zalli thotë se fillimisht martesa e tyre ishte e lumtur, por më pas kanë ndërhyrë nëna dhe motra e ish-gruas, duke bërë që të nisnin edhe konfliktet. Pas kësaj situatë, pas kësaj situate ka ardhur divorci i prindërve të dy vajzave.
“Pashë vinçin dhe hipa mbi të. Nuk pashë rrugëzgjidhje tjetër. Ç’kuptim ka jeta ime pa fëmijët?
Vajzat e mia janë 9 dhe 8 vjeç. Përmbaruesja dhe psikologja hynë brenda për të folur me vajzat, ndërsa mua më lanë jashtë me dy inspektorë të zonës. Vajza e madhe më është larguar. E kanë “fryrë” kundër meje. Dy vite pas divorcit, ish-gruaja pësoi një aksident rrugor. Por në një tjetër aksident të dytë, dëmtimet ishin të mëdha dhe sot është e paralizuar”, tregoi Saimir Zalli në emision.
Por, lezhjani nuk është ndalur me kaq, pasi halli i tij e ka çuar të marrë një tjetër vendim ekstrem, pikërisht t’i vërë flakën vetes ndërkohë që seanca parlamentare pritej të niste nga moment në moment.
Fatmirësisht, forca e Gardës ka ndërhyrë menjëherë duke shmangur tragjedinë dhe i lënduari është dërguar në spital për ndihmën e nevojshme mjekësore.
Edhe i vëllai i Saimirit e ka mësuar ngjarjen e rëndë nga televizioni, ndërsa ka rikonfirmuar se arsyeja është pikërisht ndalimi që po i bëjnë për të parë fëmijët e tij:
“Nuk dija asgjë. U befasova kur pashë Saimirin në televizor teksa tentonte t’i jepte fund jetës. Familjarët e ish gruas nuk e lejojnë të takojë fëmijët. Gjykata i ka dhënë të drejtë Saimirit të takojë fëmijët, por kjo e drejtë nuk zbatohet”, ka thënë vëllai i Saimir Zallit./ Tirana Today
