Ashtu sikurse u njoftua nga Ministrja e Mbrojtjes, Olta Xhaçka, efektivë të Policisë Ushtarake dhe Batalionit Special të Forcave tona të Armatosura janë pozicionuar në territorin e aeroportit të Rinasit.
Siç shihet edhe nga pamjet, mjetet e ushtrisë janë vendosur në perimetrin e sigurisë së aeroportit “Nënë Tereza”.
Kujtojmë se ministrja Xhaçka paralajmëroi sot se Policia Ushtarake do të dislokohet në këtë territor, për të garantuar siguri.
“Duke qenë që në një distancë fare të shkurtër nga Aeroporti i Rinasit ndodhet e vendosur edhe Komanda Ajrore e Forcave të Armatosura, kam urdhëruar që edhe Policia Ushtarake të dislokohet në këtë komandë, duke ju bashkuar kështu Policisë së Shtetit për ta mbështetur atë në garantimin e sigurisë së aeroportit”, deklaroi Olta Xhaçka.
