Ëndrra banorëve të fshatit Skurajt u bë realitet afro shtatë vite më parë, ndërsa sot ajo është më e mjeruar se kurrë .
Në pamje të parë dukej një urë madhështore (vetëm për këmbësorë) e ndërtuar bukur dhe me kujdes sa që shpesh grupe të rinjsh apo çifte të sapomartuarish nga Laçi, Lezha, Mirdita apo Burreli në ritualin e tyre të celebrimit martesore shikoje tek bënin foto apo video me të gjithë të ftuarit e shoqëruesit për ta patur si një kujtim të bukur nga dita e celebrimit të martesës së tyre.
Kjo urë e varur e tipit pasarelë ia shtonte dhe më shumë bukuritë e hijshme luginës së Matit sapo lije majtas Rrugën Durrës-Kukës-Prishtinë, ku dihet se përgjatë bregut të lumit, fshati Skuraj gjithmonë gjatë muajve të verës ka qenë dhe vijon të jetë një destinacion turistik mjaft i frekuentuar nga turistë vendas dhe të huaj.
Nga ana tjetër kjo urë ishte dhe mjaft e nevojshme për banorët e Skurajt që kanë arat, kullotat, sikurse dhe varrezat e tyre matanë lumit por dhe të fshatrave të tjera të kësaj zone si Gallatë, Malbardhë e Vinjollë.
Prej 26 vite rradhazi, çdo dy vjet sa herë bëheshin fushata elektorale kombëtare dhe vendore nga kandidatët si ato vendorë ashtu dhe ata të pushtetit qendror,vazhdimisht premtohej ndërtimi i kësaj ure, ngaqë ishte diçka e domosdoshme për banorët dhe ky premtim përkthehej në njëfarë kuptimi edhe në”vota“.
Në fakt dihet cilësia e punimeve që bëhen në kohë fushatash elektorale, edhe pse formalisht në pamje të parë pamja e jashtme e urës të jepte përshtypjen e një urë jetëgjatë, por nuk rezultoi të ishte kështu. Pak kush do ta besonte që pas afro shtatë vitesh kjo urë do degradonte aq keq sa të bëhej e pakalueshme.
Dërrasat e tabanit, me pak trashësi dhe jo me stazhinimin e duhur, janë kalbur krejtësisht dhe vende-vende janë shkërmoqur duke u shkëputur e rënë poshtë,duke krijuar hapësira tejet të rrezikshme gati si njëlloj gracke që largqoftë valët e lumit duket sikur presin dita-ditës të përpijnë ndonjë kalimtar fatkeq poshtë saj.
Më të rrezikuar janë fëmijët e shkollave, ata që përballen me realitetin e urës së rrezikshme, dhe në ditën e parë të shkollës, do të shoqërohen nga prindërit e tyre për të ndjkur rrugën e dijes. Përpos të vegjëlve këtë urë e frekuentojnë çdo ditë të moshuar, të rinj, punëtorë, njerëz të zakonshëm që u duhet të kalojnë andej ditën dhe natën.
Janë këta banorë që hera -herës mundohen të riparojnë ndonjë dërrasë, që tashmë thuajse janë shkërmoqur tërësisht. Pamjet e tanishme të kësaj ure nuk kanë nevojë për më shumë koment sepse flasin vetë.
Banorët e atyshëm, duke parë gjendjen e urës prej shumë vitesh në këtë mënyrë, janë skeptikë dhe thonë se nuk presin që autoritetet vendore të akordojnë ndonjë fond për rikonstruksionin e saj, sepse ata me gjasë që tani janë të zënë me punë të tjera,mbase edhe më të rëndësishme se sa kjo, por këtu bëhet fjalë për rrezik ekstrem të jetëve njerëzore.
Gjëja më e shkurtër dhe më e arsyeshme që mund të bëhet nëse nuk ndërhyhet për riparimin e saj, të paktën policia duhet të lëshojë një urdhër i cili të bllokojë lëvizjen në këtë urë, pra ajo duhet të mbyllet për arsyen e qartë se kalimi nëpër te cilësohet tejet i rrezikshëm dhe me pasoja fatale për jetët njerëzore.
Nëse ndodh një fatkeqësi sot, kur njihet fort mirë problematika e saj, nuk kanë më rëndësi dhe janë të panevojshme masat që merren më pas. Prej katër vitesh Mimi Kodheli ish-Minitre e Mbrojtjes dhe deputete në Qarkun Lezhë, a thua pati premtuar riksontruksionin e urës së mjeruar në fshatin turistik Skuraj.
Nga: Ahmet Zani
