Komiteti i Investimeve Strategjike ka njoftuar se ka refuzuar dhënien e lejes për realizimin e një mega-projekti turistik në Divjakë.
Sipas këtij Komiteti, projekti i kompanisë Mabetex e cila është në pronësi të biznesmenit kosovar, Behgjet Pacollit shkel ligjet në fuqi për ruajtjen e Parqeve Kombëtare.
Publikimi i këtij vendimi është bërë vetëm pak ditë më parë, ndërsa vetë vendimi ishte marrë në mars të këtij viti.
Punimet për projektit ‘Divjaka Resort’ nisën në vitin 2015 me leje nga qeveria shqiptare. Por prej muajsh punimet në këtë zonë kishin ndaluar. Projekti në fjalë parashikohej të shtrihej në një sipërfaqe gjigande prej 3,342 hektarësh hapësirë. Nga kjo sipërfaqe: 200 hektarë do të ishin plazh, ndërsa 1,050 hektarë pyll.
Në zonën e resortit parashikohej të ndërtoheshin 370 vila dhe 2,350 apartamente, në të cilat mund të akomodoheshin deri në 18,000 turistë. Ndërkohë, për të stimuluar zhvillimin e faunës dhe florës projekti parashikonte edhe një lagunë prej rreth 1,270 hektarësh.
Shoqatat ambjentaliste e kundërshtuan këtë projekt dhe po ashtu autoritetet shtetërore konstatuan disa shkelje ligjore që paraqiste ky projekt.
Komiteti i Investimeve Strategjike, që kryesohet nga kryeministri Edi Rama, ka vendosur: “Mospranimin e kërkesës për përfshirjen e projektit investues “Divjaka Resort Albania”, me subjekt investues Mabetex Group, në Divjakë, në procedurën e veçantë, pasi tipologjia e projektit të paraqitur nuk është në përputhje me legjislacionin për mbrojtjen e mjedisit dhe legjislacionin për zonat e mbrojtura”.
