Në takimin që zhvilloi me drejtues të Policisë së Shtetit, kryeministri Edi Rama dekoroi Ina Nukun, efektiven që mbeti e plagosur disa muaj më parë në protestën e banorëve të Astirit.
Teksa i akordoi në shenjë mirënjohje ‘Yllin e Mirënjohjes’, kryeministri Rama i ka puthur dorën gjatë ceremonisë së sotme.
“Një mirënjohje e falënderim të veçantë për 60 efektivët e lënduar gjatë dhunës agresive kundër shtetit. Më vjen mirë që këtu mes jush ndodhet simboli i rezistencës, kolegia dhe mikja juaj, tani e them dhe me krenari edhe mikja ime, Ina Nuku. Ina ra pre e një sulmi qorr. Një vajzë e zonja dhe e bukur me rezultate shumë të mira, studente shumë e mirë. Ina u plagos rëndë përballë politikës së rrugës. Ina Nuku reagoi menjëherë ndaj një sulmi që i rrezikoi jetën, por nuk shpëtoi dot dorën. Sot është dita e duhur për t’i dedikuar Inës dhe të gjitha vajzave që shërbejnë në policinë e shtetit me akordimin e yllit të mirënjohjes së kryeministrit”, tha Rama.
Kujtojmë se qeveria e dërgoi Ina Nukën në Turqi, ku u rikuperua nga dëmtimi, dhe tashmë ajo i është rikthyer detyrës së saj në Policinë e Shtetit.
