Shqipëria do të presë Skocinë më 17 nëntor, në ndeshjen e fundit në grupin e “Ligës së Kombeve” sa i përket kuqezinjve. Grupi i lojtarëve të grumbulluar nuk është plotë, pasi është shoqëruar me disa dëmtime, ku së fundmi është larguar edhe Ermir Lenjani.
Kuqezinjtë në ndeshjet e fundit nuk kanë marrë rezultate pozitive dhe për këtë arsye trajneri Christian Panucci pritet të ndryshojë skemën për të marrë një rezultat sa më pozitiv. Duke parë rreshtimin që është bërë në stërvitjen e kombëtares ka shumë pak vend për dyshim rreth formacionit.
Në portë do të jetë Strakosha, para Berishës, pasi gardiani i Lazios është duke kaluar në formë të mirë duke u përfshirë edhe në formacionin e Europa League. Binaku, Veseli dhe Gjimshiti do të kenë vendin e sigurt në mbrojtje, ndërsa Mavraj është në balotazh me prurjen e re, Ardian Ismajlin.
Nga ana tjetër Kaçe do të rikthehet në qendër të mesfushës, ndërsa Grezda, Memushaj, Xhaka dhe Uzuni do të jenë të gjithë në mbështetje të Bekim Balajt, i cili do të jetë i vetëm në majën e sulmit.
Formacioni i mundshëm: Strakosha, Veseli-Mavraj(Ismajli)-Gjimshiti-Binaku, Kaçe, Uzuni-Memushaj-Xhaka-Grezda, Balaj. Trajner: Christian Panucci
