Shqipëria do të përballet në mbrëmje me Turqinë në “Loro Boriçi”, në Shkodër në ndeshjen e parë eliminatore të Europianit 2020. Trajneri Christian Panucci e ka mbajtur larg mediat gjatë përgatitjes së kësaj ndeshje, por në konferencën para ndeshjes zbuloi disa nga emrat që mund ta nisin si titullarë këtë sfidë. Por asgjë nuk është e qartë për lojtarët kuqezi.
Formacioni – Mungesa e Thomas Strakoshës e bën të qartë se kush do të jetë gardiani që do të mbrojë katërkëndëshin në sfidën përballë Turqisë, pikërish Etrit Berisha. Ndërsa në të djathtën e tij, me shiritin e kapitenit në krah do të jetë Elseid Hysaj.
Qendra e mbrojtjes pritet të formohet nga dyshja Ismajli-Gjimshiti. Ismajli është duke kaluar një formë fantastike me ekipin e tij dhe paraqitja në seancat stërvitore duket se i ka siguruar një fanellë titullari. Ndërsa Gjimshiti duke qenë se është kthyer në një nga titullarët fiks të Gasperinit te Atalanta në Serie A, është në avantazh me Arlind Ajetin.
Ndërkohë, në të majtë, trajneri Panucci nuk ka lënë të kuptohet qartë zgjedhja e tij. Naser Aliji është zgjedhja e parë, por paraqitjet e mira të Frederik Veselit krijojnë një dyshim, me gjithë deklaratën e këtij të fundit në konferencë se nuk priste një fanellë titullari.
Në mesfushë ka shumë dilema, pasi është një repart ku lojtarët e grumbulluar kanë të gjthë minuta në këmbë dhe janë të gatshëm për të dhënë maksimumin. Taulant Xhaka dhe Amir Abrashi pritet të rikthehen së bashku në qendër. Me të parin të zhvendosur në të djathtë, ndërsa “pitbulli” do të ketë detyrën të shkatërrojë të gjitha aksionet e kundërshtarëve.
Memushaj, eksperienca e të cilit dhe qetësia janë virtyte të rëndësishme, mund ta avantazhojnë, por nuk përjashtohen edhe surprizat. Cili? Kristian Qose.
Më i riu në listën e Panuccit mund të jetë alternativa që ofron gjatësi në fushë, grinte dhe dëshirë të madhe për të treguar se e ka merituar të jetë në listë. Por, jo më pak i mundshëm është edhe Ergys Kaçe, kualiteti i të cilit dhe saktësia në vertikalizim, mund t’i jepnin Shqipërisë vizion në ndërtimin e lojës.
Në dukje është reparti më i parashikueshëm, por duke njohur Panuccin që nuk ua ka thënë as lojtarëve formacionin, asnjëherë nuk flitet me bindje. Sadiku pritet të udhëheqë sulmin, ndërkohë që Grezda e Uzuni pritet të jenë motorët mbështetës në krahë.
