Shkrimtarja Flutura Açka, me një gjuhë të zgjedhur ashtu sikundër di ta bëjë ajo më mirë, ka reaguar lidhur me ikjen e Agron Tufës nga Shqipëria, me argumentin se është kërcënuar vazhdimisht për shkak të qëndrimeve dhe punës së tij.
Açka kujton takimin me Tufën në Panairin e Librit, ndërsa ka theksuar se me heshtjen e të gjithëve, ne e përzumë nga vendi. Ajo, mes rreshteve shpreh revoltën dhe mërzinë që e ka kapluar. Ndërsa do të dijë se ku ishin ata njerëz kur Agroni kërcënohej, fyhej e poshtërohej.
Statusi
Liria dhe AntiLiria e Agronit
Gjatë ditëve të panairit të Librit, me Agronin na u desh të shkonim në promovimin e një autoreje të re shqiptare. Me qetësinë e tij, me një kujdes të admirueshëm profesional, Agron Tufa i bëri një analizë të hollësishme librit poetik që na kishe mbledhur, e tillë, që nuk mund të ishte e një njeriu që ishte në nxitim e sipër për të ikur. Ajo ishte edhe hera e radhës kur u rrokëm përqafe, por jo e fundit. Ne e përzumë Agronin me heshtjen tonë. Tani po flasin shumë, dhe mirë bëjnë, por kur Agroni kërcënohej, fyhej, poshtërohej nga po ata njerëz që nuk kursejnë askënd, nga po ato puseta me imunitet shtetëror shpesh, ku ishim ne? Agron i dashur, bëre shumë mirë, ne jemi mësuar ta përzëmë me shkelma “Mendjen” nga Shqipëria. Europa është atdheu i Lirisë, Shqipërinë më parë duhet ta pastrojmë nga AntiLiria, por kur?
Drejtori ekzekutiv i Institutit për Studimin e Krimeve dhe pasojave të Komunizmit në Shqipëri (ISKPK), Agron Tufa, është larguar nga Shqipëria duke kërkuar azil politik jashtë vendit. Lajmin e ka bërë të ditur përmes një postimi në rrjetet sociale, avokati i tij Kujtim Cakrani.
“Kërcënimet dhe zvarritja pafund e gjyqit, mosfillimi i procesit ndaj Cajës, kërcënimet në rrugë dhe format e fshehta të shantazhit, e kanë shtyrë Drejtorin e Institutit për Studimin e Krimeve të Komunizmit Z. Agron Tufa, të kërkojë strehim politik për të mbrojtur familjen dhe jetën e tij! Në një vend ku krimi komunistë i djeshëm është më i egër se kurrë, kërkimi dhe vendosja e drejtësisë është e pamundur”, shkruan Cakrani.
Agron Tufa ka qenë në qendër të sulmeve nga mazhoranca, të cilët e akuzonin se po shtrembëronte historinë, dhe e kërcënuan me shkarkim nga pozicioni që mban. Debatin më të ashpër publik Tufa e ka pasur me deputetin e PS, Spartak Braho.
