Nga Anxhela Ferra
Shqipëria është një territor tektonikisht aktiv, kështu shprehen sizmologët. Kjo pasi historikisht vendi ynë është prekur nga tërmete të forta, shumë herë edhe vdekjeprurës.
Berat, 17 tetor 1851, 400 ushtarë të vrarë në Kala.
Tepelenë, 20 nëntor 1920, 36 të vrarë dhe 102 të plagosur. U shkatërruan 2 500 shtëpi dhe u lanë të pa strehë 15 000 veta.
Korçë, 26 maj 1960, u shkatërruan plot 1479 ndërtesa.
Roskovec, 17 nëntor 1982, duke u ndjerë tërmeti edhe në Fier, Librazhd e Berat, u shkatërruan 16 534 ndërtesa, u vra 1 person dhe 12 të plagosur.
Tiranë, 7 janar 1988, u dëmtuan 2083 shtëpi.
Këto janë vetëm disa nga tërmetet që kanë prekur vendin tonë, duke bërë dëme të mëdha materiale, si edhe njerëzore.
Sizmologu Edmond Dushi në një intervistë për Tirana Today thotë se pas një periudhe kohore, Shqipëria rrezikon të preket nga një tërmet edhe më i fortë.
“Tërmete të fortë quhen ata që kanë magnitudë mbi vlerën 6 të shkallës rihter. Ndërkohë, tërmeti i pak ditëve më parë, futet tek tërmetet e mesëm. Ne presim çdo vit një tërmet me magnitudë mbi 4, kurse tërmetet me magnitudë mbi 5 mund të variojnë nga tre deri në pesë vjet. Tërmetet e fortë e kalojnë një shekull si periudhë përsëritje, por kjo nuk do të thotë që do të ndodhë njëherë në 100 vjet.
Tërmeti i datës 4 korrik i ndodhur në Gjirin e Lalzit ishte një tërmet i cekët. Edhe pse tërmetet e cekët japin efekt më të madh shkatërrues në objekte. Por, thellësia e tij ishte rreth 18 km dhe për shkak të magnitudës së tij të moderuar, nuk bëri dëme të mëdha.
Statistikat janë shumë të qartë dhe kokëforta, të cilat tregojnë që në Shqipëri kanë ndodhur tërmete prej shumë vitesh. Dhe përsëri do të ndodhin. Sepse ka një rregull, që atje ku ka ndodhur, pritet të ndodhë përsëri.
Brenda territorit të Shqipërisë, janë disa zona të cilat kanë shtrirje gjatësore, ndër të cilën përmendin zonën Jonike dhe atë Adriatike, si më problematiket. Lëkundjet nuk janë shuar ende, por ato janë të papërfillshme. Ka pasur një tërmet ditën e djeshme në të gdhirë në Lezhë, me magnitudë 3.3 të shkallës rihter. Më pas janë regjistruar dy tërmete me magnitudë 3.7 dhe 3.2, në zonën e Klosit. Si edhe kanë ndodhur dy mikro-tërmete në zonën e Himarës,”-thotë për Tirana Today sizmologu Dushi.
Ndërkohë, tërmeti i datës 4 korrik, me epiqendër në rrethinat e Durrësit, i cili u ndje edhe në kryeqytet, krijoi panik masiv te njerëzit. Kjo pasi nuk janë të mësuar me tërmetet. Dhe shumë prej tyre, nuk dinë si të mbrohen, nga mungesa e informacionit.
“Nëse do të ndodhë tërmeti, është shumë e vështirë për ta parashikuar apo deklaruar. Kjo pasi vetë shkenca nuk ka evoluar deri në atë pikë sa ta parashikojë. E rëndësishme është që në momentin kur ndodh një tërmet, njerëzit duhet të dalin dhe të braktisin godinën e tyre, sepse asnjëherë nuk dihet nëse do të ketë një tërmet më të fortë.” TIRANA TODAY
