Zbulohen detaje të reja lidhur me grabitjen në Rinas, ku u morën disa milionë euro më 9 prill. Pronari i servisit që ndodhet në rrugën e vjetër Elbasan-Rrethrrotulimi i Bradasheshit, aty ku dyshohet se u modifikua fugoni me mbishkrimin “Hetimi Tatimor”, ka thënë se servisin e kishte dhënë me qira.
Gazetarja Klodiana Lala ka mundur të kontaktojë me telefon pronarin e servisit, shtetasin Gentian Sharra, i cili ka konfirmuar se servisin ia kishte dhënë me qira shtetasit Eldi Çala.
“Nuk kisha kontratë noteriale me të. Nuk kam dijeni për aktivitetin e paligjshëm që është kryer në këtë servis”,- ka thënë Sharra.
Eldi Çala është vëllai i Klement Çalës, ky i fundit i konsideruar si mjeshtër i grabitjes së bankave, i identifikuar për grabitjet e transfertave bankare të bankave të nivelit të dytë në aksin Qafa e Kasharit – Rinas.
Ky servis është i kyçur tashmë dhe konsiderohet provë materiale për prokurorinë dhe policinë.
