Ditën e sotme është mbajtur në selinë e NATO-s në Bruksel, ceremonia e ngritjes së flamurit të Maqedonisë së Veriut.
I pranishëm në këtë ceremoni ishte edhe kryeministri teknik, Oliver Spasovski, i cili tha se vendi po i bashkëngjitet Aleancës më të fuqishme të sigurisë.
“Flamuri i Maqedonisë së Veriut është simbol i sigurisë dhe prosperitetit të vendit tonë. Me të vërtetë ne sot po zhvillojmë një betejë tjetër , betejë me virusin korona por për një moment do të ndalemi dhe do të festojmë. Sot është një ditë që do të mbahet mend, ditë e historisë, ditë kur flamuri ynë iu bashkëngjit atyre të aleancës veriatlantike. Aleancës më të madhe të sigurisë në historinë e njerëzimit”, tha mes tjerash Spasovski.
Ceremonia e ngritjes së flamurit u mbajt njëkohësisht edhe në selinë e Komandës së Bashkuara për Operacione (Shape – Mons) dhe në selinë e Komandës së Bashkuar të NATO-s, Virxhinia.
