Udhëheqësja e rrëzuar e Mianmarit, Aung San Suu Kyi, është dënuar me katër vjet burg, i pari në një seri vendimesh që mund ta dënojnë atë me burgim të përjetshëm. Ajo u shpall fajtore me akuzën e “nxitjes së mosmarrëveshjes” dhe “thyerjes së rregullave të Covid-19” sipas një ligji për fatkeqësitë natyrore.
Zonja Suu Kyi përballet me 11 akuza në total, të cilat janë dënuar gjerësisht si të padrejta. Ajo ka mohuar të gjitha akuzat. Aung San Suu Kyi ka qenë në “arrest shtëpiak” që nga një grusht shteti ushtarak në shkurt, i cili përmbysi qeverinë e saj të zgjedhur civile.
Nuk është e qartë se kur ose nëse zonja Suu Kyi do të shkojë në burg. Bashkë i pandehuri Win Myint, ish-presidenti dhe aleati i partisë Lidhja Kombëtare për Demokraci (NLD) të zonjës Suu Kyi, u burgos gjithashtu të hënën për katër vjet me të njëjtat akuza.
Grupi i të drejtave Amnesty i quajti akuzat “false”, duke thënë se ishte “shembulli më i fundit i vendosmërisë së ushtrisë për të eliminuar të gjithë opozitën, dhe për të mbytur liritë në Mianmar”.
Zonja Suu Kyi do të dalë në gjykatë më 14 dhjetor, kur ajo do të përballet me akuzat për posedim të paligjshëm të radiove.
Mbi 76-vjeçaren rëndojnë akuza të shumta për “korrupsion” dhe “shkelje të aktit të sekretit zyrtar”.
Aung San Suu Kyi kaloi gati 15 vjet në paraburgim në duart e ushtrisë midis 1989 dhe 2010 dhe u nderua me Çmimin Nobel për Paqen, për punën e saj për të sjellë demokracinë në Mianmar.
Partia e saj, Lidhja Kombëtare për Demokraci (NLD) mori një fitore dërrmuese në vitin 2015, por ajo u pengua të bëhej vetë presidente nga rregullat që përjashtonin ata me fëmijë shtetas të huaj nga mbajtja e asaj zyre. Ajo konsiderohej gjerësisht si sundimtarja de fakto e vendit.
Megjithatë reputacioni i saj jashtë vendit u dëmtua rëndë nga mënyra se si ajo e trajtoi krizën Rohingya, e cila filloi në 2017.
Në vitin 2019, zonja Suu Kyi u paraqit në Gjykatën Ndërkombëtare të Drejtësisë (ICJ) të OKB-së për të mbrojtur vendin e saj kundër akuzave për gjenocid.
Burimi i lajmit: BBC. Përshtatur nga Tirana Today
