Deputeti i Partisë Demokratike, Astrit Patozi ka uruar kandidatin demokrat, Isa Sakja për fitoren e Bashkisë së Kavajës.
Patozi e ka quajtur triumfin e Sakës një fitore çliruese për Kavajën, ndërsa shkruan se ajo duhet të shërbejë si një shkëndijë e rindezjes së shpirtit të demokratëve në të gjithë Shqipërinë.
“Ne do t’ia dalim”, përmbyll Patozi, duke u shprehur optimist pavarësisht gjendjes së PD-së, e cila humbi thellë në zgjedhjet parlamentare.
POSTIMI I PATOZIT:
NJË FITORE ÇLIRUESE PËR KAVAJËN
Urimet më të mira Isa Sakja!
Një rikthim i vuajtur, por çlirues dhe i mezipritur tek fisnikeria dhe vlerat e marra peng prej vitesh të Kavajës.
Fitore e bukur për qytetin tim, edhe pse është vetëm një oaz i vogël në shkretëtirën e madhe të humbjes së Partisë Demokratike në zgjedhjet e 25 qershorit.
Le të shërbejë ajo si një shkëndijë e rindezjes së shpirtit të demokratëve në gjithë Shqipërinë. Ashtu si para 27 vjetësh, kur fitorja e madhe e Partisë Demokratike niste nga Kavaja.
Ne do t’ia dalim.
