Fitore madhe në transfertë të vështirë, rikthehet Real Madrid (Video)

Shenja të mira nga Real Madrid, arrin të marrë një fitore të madhe në “Mestalla” përballë Valencias me rezultat bindës 4-1. Los Blancos bëjnë një kthesë të madhe pas eliminimit nga Kupa e Mbretit, duke zhvilluar një lojë dominuese.

Të besuarit e Zinedine Zidane e filluan mirë ndeshjen dhe dy penallti të Ronaldo-s në minutën e 16’ dhe 38’ kanë dyfishuar rezultatin për miqtë. Valencia reagon mjaft mirë në fundin e pjesës së parë, por Kondogbia nuk tregohet i saktë nga shumë pranë portës. Në fillim të së dytës është Santi Mina që shënon për vendasit dhe shkurton diferencën. Vendasit fillojnë të ushtrojnë presion para portës së Keylor Navas por nuk arrijnë të rrezikojnë si duhet.

Vetëm 6’ minuta nga përfundimi i takimit është Marcelo që shënon për 3-1, pas një kombinimi perfekt me Asension dhe një gabimi të portierit Neto. Në fund është gjermani Toni Kross që shënon një supergol nga jashtë zone, edhe këtë herë është Marco Asensio që nxjerr një asist perfekt me finte për madrilenin. Dy fitore radhazi në La Liga, diçka normale për Real, por jo edhe aq normale për Real-in e momentit që po vuan për të gjetur qëndrueshmëri.