Benevento ka shokuar kuqezinjtë e Milanit në “San Siro” duke u marrë një fitore 1-0, në ndeshjen e vlefshme për javën e 34 në Serie A. Benevento shënoi me anë të sulmuesit Pietro Iemmello, kur u mbush gjysmë ore lojë.
Miqtë luajtën me dhjetë futbollistë në dhjetë minutat e fundit, pas kartonit të kuq të marrë nga Diabate, pas kartonit të dytë të verdhë, gjithsesi arritën të mbrojnë fitoren historike. Kjo ishte fitorja e parë e Benevento jashtë fushe në historinë e saj në Serie A. Milan nuk fiton prej gjashtë ndeshjesh dhe kjo ka bërë që jo vetëm të heq dorë nga përfundimisht te prania në Champions sezonin e ardhshëm, por gjithashtu të vërë në rrezik praninë në Europa League.
Nga ana tjetër, Benevento ka rënë matematikisht në Serie B dhe është në vendin e fundit të kampionatit, por mund të krenohet me faktin se nuk ka humbur asnjë ndeshje ndaj kuqezinjve, sepse krahas fitores së djeshme, ata barazuan 2-2 në fazën e parë me një gol të shënuar nga portieri në minutën e fundit.
Sezoni i Milan u ndreq për një moment, pas ardhjes së trajnerit Gattuso, por tani ekipi kuqezi është rikthyer sërish në tunel, pasi fitorja e tyre e fundit daton rreth një muaj më parë, më 18 mars kundër Chievo.