Real Madrid është kthyer tek fitorja në La Liga përballë Malagas me rezultatin 3-2 në “Santiago Bernabeu”. Një ndeshje mjaft e ndërlikuar për ‘los blancos” që rrezikuan ta fitonin ndeshjen, pasi Ronaldo gabon nga pika e bardhë e penalltisë por në moment e rikuperon gabimin.
Madrilenët kalojnë që në minutën e 9’ në avantazh pas një goli të shënuar nga Benzema, ku protagonist ishte Ronaldo duke kthyer në zonë një top mjaft të vështirë. Por barazimi ka ardhur pas vetëm 9’ minutash nga Rolan i cili shfrytëzon mjaft mirë një vendosje të gabuar të mbrojtjes dhe gjendet i lirë në zonë ku godet dhe topi përfundon në rrjetë. Por festa nuk ka zgjatur shumë pasi Casemiro dërgon sërish topin në rrjetë pas një goditje këndi të ekzekutuar nga Toni Kroos. Pjesa e parë është mbyllur në fitore të lojtarëve të drejtuar nga tekniku Zidane të cilët ishin në kërkim të golit të tretë.
Në fillim të pjesës së dytë kanë qenë më kërkues miqtë e Malagas dhe në të 58’-ën minutë arritën të barazonin sërish rezultatin me anë të Castro. Ky i fundit shënon një supergol nga një distancë mjaft e largët që shokon madrilenët. Por në të 75’-ën, një ndërhyrje e gabuar në dëm të Modric në zonë, sjell edhe një 11-metërsh. Merret përsipër për tu ekzekutuar nga ylli portugez Ronaldo, por që në tentativën e parë pritet nga portieri Jimenez, por topi kthehet sërish në këmbët e Ronaldos dhe këtë herë nuk gabon.
Me këtë gol vuloset edhe rezultati final i takimit dhe fitoren e Real Madrid, që momentalisht ndodhet në vendin e tretë me 27 pikë.
