Karim Benzema është shpallur fituesi i “Topit të Artë” 2022. Trofeu u dorëzua nga Zinedine Zidane. Në moshën 34 vjeçare, sulmuesi i Real Madrid është në majën e botës si futbollisti më i mirë.
Mbrëmjen e së hënës në Paris, sulmuesi i Real Madrid është kurorëzuar si futbollisti më i mirë i sezonit 2021-22. 34 vjeçari (më i vjetri që ka fituar këtë trofe në 66 vite) shënoi 42 gola sezonin që lamë pas, duke qenë çelësi kyç për suksesin e Real Madrid në Champions League dhe në La Liga.
Sukseset e njëpasnjëshme dhe rëndësia e tij për ekipin ka bërë që “France Football” me organizatorët të shpallnin francezin si lojtarin e vitit.
“Topi i Artë” nuk është i pajisur me një shumë ekonomike, por shumë lojtarë kanë klauzola të ndryshme në kontratat e tyre me të cilat klubet i shpërblejnë për arritjen e objektivave të caktuara, si p.sh. marrja e një çmimi të kalibrit të Topit të Artë ka një ndikim pozitiv në imazhin e klubit.
Benzema do të prezantojë “Topin e Artë” në Bernabeu të shtunën. Për këtë arritje pritet një interes i jashtëzakonshëm njerëzish. Bonusi që Benzema do të marrë për fitimin e Topit të Artë është rreth një milion euro.
Çmimi mund të nënkuptojë për sulmuesin francez rinovimin e tij me bardhezinjtë edhe për një sezon, deri në qershor 2024 . Një horizont i ri për kapitenin madrilen që të vazhdojë të thyejë rekorde. Ai është tashmë golashënuesi i dytë më i mirë në historinë e klubit, dhe lojtari i gjashtë me më shumë paraqitje për Madridin.
