Dënohet me 30 muaj burg shtetasi rus për krime kibernetike. Kirill Victorovich Firsov u arrestua në mars të vitit të kaluar me të arritur në Aeroportin e Nju Jorkut, shkruan “REL”. Ai akuzohej se ka administruar një faqe në internet e cila tregtonte për kriminelët në internet informacione të vjedhura të të dhënave nga kartelat e kreditit dhe informacione personale.
Prokurorët amerikanë thanë se për shtatë vjet platforma kreu shitje që tejkalonin shifren prej 17 milionë dollarësh, duke përfshirë të paktën 1.2 milion dollarë nga informacioni i vjedhur në SHBA.
“Kjo platformë u siguroi kriminelëve kibernetikë qasje të lehtë në llogaritë personale dhe informacionin e njerëzve në të gjithë botën, përfshirë amerikanët”, tha për “REL” ushtruesi i Detyrës së Prokurorit të SHBA-së, Randy Grossman. Firsov udhëhoqi faqen “deer.io”, një platformë në internet e cila tashmë është mbyllur. Baza e saj ishte në Rusi dhe ajo lejonte kriminelët në internet të blejnë dhe shesin llogari të vjedhura të hakuara.
