Regjisori Altin Basha përgjatë një interviste televizive deklaroi se Teatri Kombëtar ishte “godinë që nuk u bë dot kurrë teatër”.
“Në pamje e trishtueshme, por nuk është pa arsye, nuk është një gjë që do të mbetet ashtu, do nisin punimet e një teatri të ri.
Ajo ndërtesë lindi për të mos qenë teatër, u adoptua, po nuk u bë kurrë teatër. Është përfundimi i një procesi 3-vjeçar. Periudha e fundit u bë krejtësisht agoni, rrinin njerëz që nuk e dinin ca bënin, shfaqje të improvizuara, të paverifikuara, u bë një gjendje e padurueshme, që nuk kishte sens, duhet të merrte drejtim kjo gjë”, u shpreh Basha.
Ky i fundit renditi edhe arsyet se përse sipas tij teatri duhet të shembej:
“Kam qenë partizan i restaurimit, në bazë të ekspertëve që e kanë lënë të shkruar për gjendjen e ndërtesës, thonë që ndërtesa është në rrezik shembje.
Nëse do ndërtohet siç ka qenë, nuk do ketë gardërobë, nuk do ketë tualete mjaftueshëm. Edhe kotecat e pulave i rezistojnë tërmeteve, por prapë kotecë mbeten! S’është argument që i rezistoi tërmetit dhe është i vlefshëm”.
Kujtojmë se regjisori ishte një ndër artistët që firmosi për shembjen e Teatrit Kombëtar.
