Kapiteni i anglezëve Harry Kane është frikësuesi numër 1 i mbrojtjes italiane, në prag të finales së Euro 2020, por edhe vetë sulmuesi i Tottenham e di që nuk do të jetë një shëtitje në park: “Chiellini dhe Bonucci janë mbrojtës të shkëlqyer. Ata e lexojnë lojën shumë mirë dhe dinë ku të qëndrojnë. Ata janë dy luftëtarë, kështu që unë pres një luftë të madhe, por kjo është arsyeja pse unë luaj futboll”, tha Kane, duke folur për “Uefa.com”. Anglia është gati dhe e karikuar për të marrë trofeun: “Nuk ka vend më të mirë se Wembley për të fituar trofeun tonë të dytë. Ekzaltimi do të jetë i lartë, por edhe tensioni.”, tha Kane.
Sipas Kane, “Të luash në Wembley e bën rastin edhe më të rëndësishëm dhe të veçantë këtë finale. Do të jenë tifozë tanë që do të këndojnë dhe do të na inkurajojnë dhe energjia do të jetë e pabesueshme. Duhet vetëm të zbresim në fushë, të marrim të gjithë ngarkesën emocionale të stadiumit dhe ta përdorim në avantazhin tonë”.
Ai ka kujtuar edhe të vetmin trofe të fituar nga “Tre luanët” 55 vjet më parë. “Në 1966, natyrisht, Anglia fitoi Kupën e Botës dhe ishte një rezultat i jashtëzakonshëm për ekipin dhe vendin. Tani ne kemi mundësinë të shkruajmë një kapitull tjetër të historisë, edhe për prindërit tanë dhe për të gjithë ata që nuk e kanë parë kurrë Anglinë në një finale. Unë e di që vlen për të gjithë vendin. Është një moment i veçantë dhe nëse arrijmë të fitojmë do të kujtohemi për pjesën e mbetur të jetës sonë. Kjo është sfida dhe duhet ta pranojmë”, përfundoi sulmuesi që ka shënuar 4 gola deri tani në Europian.
