Po zhvillohet mbrëmjen e sotme në Doha të Katarit, Botërori i Atletikës, ku Shqipëria përfaqësohet vetëm nga atletja Luiza Gega.
Gega garoi mbrëmjen e sotme në finalen e garës 3000 metra me pengesa, e cila u dominua nga fillimi e deri në fund, nga atletja keniane, Beatris Çepkoeç. Përfaqësuesja e Kenias i mbylli 3 kilometrat e para, në kohën 8 minuta, 57 sekonda e 84 të qindtat.
Ndërkohë, e dyta u rendit përfaqësuesja amerikane Koburn, ndërsa e treta gjermania Krause. Luiza Gega nuk mundi që gjatë garës që të bashkohej me grupin kryesues, duke e mbyllur garimin e saj në vendin e 9-të, me kohën 9 minuta, 19 sekonda e 93 të qindtat.
Megjithatë kjo arritje e Gegës mbetet historike, pasi u bë atletja e parë shqiptare që merr pjesë në garën finale të një Botërori atletike.
