Miqësorja e programuar ndaj Ukrainës ka marrë përmasat e një telenovele për Kombëtaren shqiptare të futbollit, por pa cenuar përgatitjet e kuqezinjve. Kapriçot e skuadrës së trajnerit Shevchenko, që nga kapaciteti i vogël i stadiumit e deri te siguria, e kanë çuar çështjen në FIFA.
FIFA i ka imponuar Ukrainës që të zbresë në fushë më 3 qershor. Në rast se përfaqësuesja ukrainase nuk do të pranojë të luajë, do të duhet të dëmshpërblejë kuqezinjtë dhe kompaninë organizatore.
Opsioni i dalë së fundmi është stadiumi i Gjenevës, vetëm 2 orë larg fshatit Ferbier, ku po qëndron aktualisht ekipi kuqezi. Ndërkohë, në konferencën e programuar për shtyp, Mavraj dhe Balaj premtuan rezultat të ndryshëm nga ai me Kosovën.
Por një problem në transfertën e Kombëtares në Zvicër është lartësia e madhe e fshatit Ferbier, mbi 1.500 metra mbi nivelin e detit. Kjo është në kontrast të madh me fushën në Evian, apo në Gjenevë, e mund të krijojë probleme për shëndetin e lojtarëve.
Por, përballë akordit për të zhvilluar një miqësore, që ende nuk ka gjetur fushën, kapriçove të Ukrainës mbi sigurinë dhe impiantin, për Kombëtaren e Panuccit, lartësia e Alpeve duket shqetësimi minimal.
