Policia e Shtetit ka dalë me një informacion zyrtar lidhur me ngjarjen e ndodhur mbrëmjen e djeshme në Spitalin e Fierit, ku një person i armatosur ka qëlluar me armë zjarri. Sipas njoftimit të policisë, sherri ka nisur mes dy familjeve në Levan, ndërsa kanë mbetur të plagosur katër personat e përfshirë në konflikt.
Mësohet se personi i plagosur me levë identifikohet si Gentian Zhapa, 33 vjeç, i cili ishte nisur në spitalin e Fierit për të marrë ndihmë pas sherrit.
Ndërsa për ta shoqëruar kishte shkuar edhe babai i tij, i cili është qëlluar me armë zjarri në spital, me armën e punonjësit të policisë, teksa ky i fundit po ndihmonte për të futur të plagosurit brenda në Urgjencë.
“Në Urgjencën e spitalit një prej shoqërueseve të të dëmtuarve i ka marrë armën e zjarrit nga brezi punonjësit të policisë, i cili po ndihmonte për të futur të plagosurit në Urgjencë dhe ka plagosur me armë zjarri një prej familjarëve të palës tjetër, shtetasin A.ZH”, thuhet në njoftimin e policisë.
Njoftimi i Policisë së Shtetit:
Fier
Informacion paraprak
Në Levan të Fierit, gjatë një konflikti mes dy familjeve janë dëmtuar me sende të forta dy shtetas G.ZH dhe D.Zh, ndërsa shtetasit K.L. dhe E.M. janë lenduar me mjet prerës.
Të plagosurit janë transportuar për në Spital, për ndihmë mjekësore. Në Urgjencën e spitalit një prej shoqërueseve të të dëmtuarve i ka marrë armën e zjarrit nga brezi punonjësit të policisë, i cili po ndihmonte për të futur të plagosurit në Urgjencë dhe ka plagosur me armë zjarri një prej familjarëve të palës tjetër, shtetasin A.ZH.
Në ndihmë të punonjësve të Policisë kanë shkuar menjëherë forca të shumta policie duke kanë bërë bllokimin e dy shtetasve E.B. e D.B. dhe shoqërimin në ambientet e Drejtorisë Vendore të Policisë për veprime të mëtejshme.
FNSH dhe shërbimet e Drejtorisë Vendore të Policisë po krehin zonën për të bërë të mundur kapjen edhe të një shtetasi tjetër të përfshirë në këtë ngjarje.
Për hetimin e kësaj ngjarje Drejtori i Përgjithshëm i Policisë së Shtetit ka ngritur një grup të posaçëm hetimor me Specialistë të Hetimit të Krimeve të Rënda në Departamentin e Policisë Kriminale.
Njëkohësisht me urdhër të Drejtorit të Përgjithshëm të Policisë së Shtetit në vendngjarje kanë shkuar edhe specialistët e Drejtorisë së Standarteve Profesionale në Polici, për të verifikuar veprimet e punonjësve që ishin në momentet e para në Urgjencën e spitalit.
Nën drejtimin e Prokurorisë së Rrethit Gjyqësor Fier po vijon puna për zbardhjen e plotë të rrethanave të ngjarjes, motivit të konfliktit si dhe vënien para përgjegjësisë ligjore të personave përgjegjës.
Një ngjarje e rëndë është shënuar mbrëmjen e te shtunes në Urgjencën e Spitalit të Fierit, ku është qëlluar me armë zjarri dhe janë plagosur dy persona.
Mësohet se i plagosur në Spitalin e Fierit është Gentian Zhapa 33 vjeç. Ai është plagosur me leva në Levan pas një konflikti. Zhapa mori plagë pas një konflikti të mëhershëm.
Ndërsa, i ati i Gentian Zhapës është qëlluar me armë zjarri në spital.
